يامصر عايزة الحق !!

يا مصر عايزة الحق ؟؟ 

 إنتى اللى غلطانه ..
عُمرِك ما قُولتيلنا ...
عِشقِك يكون ازاى ؟ 

..

كل اللى حبـِّك يوم ..
داق ذل و مهانه ..
ولا يوم قدِر يكرَه ..
ولا يوم صَبَح نسّاى ...
كل اللى يتكلم ..
يدفع تمن صوتُه ..
كل اللى يتقدم ..
آخر الطريق .. موتُه ..

..
دلوقتى زعلانة م اللى بيحصل ليه ؟؟؟

 لما القيود فكِّت ..
احترنا نعمل ايه ؟؟

 نصرخ بعلو الصوت ..
و اللا السكوت أولَى ؟؟

 الدولة فيها فساد ..
واللا الفساد دولة ؟؟

 احترنا مين كداب ..
و مين معاه الحق ...
كل اما نفتح باب ..
نِلقى السواد ف الشَق ..
و الخونة و الطامعين ..
أخدوا المناب بالسهل ..
و اللوم علينا يا مصر ..
علشان عشقنا بجهل ..

..
احترنا نعمل إيه ...
و احنا اللى عاشقينك ..
نصرخ عشانك لأ ..
يقولولنا جارحينك ...
و إن قلنا يوم أيوه ..
يقولولنا عشقِك .... لأ !!!!!

.........

.....

يا مصر رغم الخوف
جوانا لسه كتير
قادرة عيوننا تشوف
قادر جناحنا يطير
حالفين نرد النور
من تانى لسماكى
و الفرحة تيجى تزور
قلب ف هواكى أسير
من خوفنا سيبنا طريق
دخل الضلام يسبق
و هربنا زى غريق
بالقشة يتعلق

.......
دلوقتى زعلانة م اللى بيحصل ليه؟
لما القيود فكت..

 قررنا نعمل إيه
نجمع قلوبنا تكون
قلب و عليكى يخاف

......
من بعد مليون صوت
متجمعين ف هتاف
و عرفنا مين كداب
و مين معاه الحق
و إيدينا فتحت باب
عدى النهار م الشق

.....
ولا خونة ولا طامعين
ليهم مناب فيكى

 وعشان هواكى يا مصر
من روحنا نفديكى
قررنا نعمل إيه
إحنا اللى عاشقينك
بنقولها مليون ﻷ
ف وش كارهينك
و إن قالوا يوم أيوه
نصرخ عشانك ..ﻷ
 ***********

كلمات الشاعرة : دعاء عبد الوهاب

أدعوكم لسماعها من فرقة بساطة

 بحق رائع